Is-Sirena Li Welldet it-Tama – Haley Azzopardi (Paul Ellul, Mark Spiteri Lucas) by L-Ghanja tal-Poplu

Is-Sirena Li Welldet it-Tama
Haley Azzopardi
Kliem: Paul Ellul Mużika: Mark Spiteri Lucas

Nistaqsi ’l-ġebel jgħidli fommok x’lissen,
inċarrat il-purtiera tal-bellus,
minn ġol-ħjatat nissamma’ l-bikja tiegħek,
u mal-kantun mirdum inħoss il-ħsus.

Il-libsa baqgħet tfuħ fil-gwardarobba,
flixkun il-fwieħa baqa’ ma nfetaħx,
il-ktejjeb tar-riċetti tqalleb waħdu,
u r-radju jdoqq id-diski ma ntebaħx.

Is-sirena li welldet it-tama,
ħarbxet f’qalbi sriep tad-dawl,
l-għabra lissnet skiet li jtarrax,
b’delli biss stajt nasal ħdejk,
din difna qabel żmienha,
bla rħama dan il-qabar,
u fjura friska f’qalbi,
is-sirena li welldet it-tama.

L-għasafar waqfu jibnu l-bejta tagħhom,
il-friegħi bdew iwennsu lil xulxin,
serbut in-nemel waqaf jaħżen kmieni,
iddejqu l-minutieri jgħoddu l-ħin.

Minn qalb is-sħab tittawwal dritt għal fuqna,
u r-riħ iwassal leħnek mat-tvenvin:
‘‘Nixtieq li r-raqda tiegħi tkun ta’ fejda,
u tqumu min-ngħas tagħkom ħbieb Maltin.’’

Is-sirena li welldet it-tama,
ħarbxet f’qalbi sriep tad-dawl...

U aħna minn hawn isfel ngħajtu ismek,
leħinna ma jasalx bit-trab maħnuq,
imm’inti tisma’ qalbna tgħajjat siekta,
urina t-triq tal-paċi minn hemm fuq.

Is-sirena li welldet it-tama,
ħarbxet f’qalbi sriep tad-dawl...
is-sirena li welldet it-tama.

Nistaqsi ’l-ġebel jgħidli fommok x’lissen