ستيب باي ستيب - أغنية مصرية \ Step By Step - Oghneya Masreya by Khaled A. ElToukhy

وسط البلد
و كوبرى قصر النيل
بنت و ولد
و قصيدة ع المنديل
و اجمل عيون فى الكون
و حبنا المجنون
و ريحة الينسون
و سِحر الجنـزبيل

زى القمر
يا ماشية ع الكورنيش
نزل المطر
بوظلك الكرانيش
مصر القديمة هناك
طلة من الشباك
و حُسنها الفتّاك
قتل الولد بشويش

فاكرة البُكا
على أى طير مقتول
و الصعلكة
بالليل فى شارل ديجول
ريحة الغورية تطير
م العتبة للتحرير
و فى قلعة الأساطير
و الشاى و صحن الفول

بان الندى
فى مراية الحلاّق
و الفضفضة
فى منتزه العشاق
خللى المحبة تدوم
من روكسى للفيوم
و الجمالية تـزوم
يا شبرا يا أخلاق