حَـكْـي 2 | نُصـي الحلو by حَـكْـي - Hakii

published on 2014-01-08T13:57:23Z

حَـكْـي 2 | نُصـي الحلو إلقاء : أنس علاء - شقيق إحدى حرائر المنصورة شعر : أحمد صلاح الدين fb.com/SaladinDoc نصي الحلو ____ نصي الحلو اللي مكمّلني لما بحس ف مرة بنقص كانت دايما بتصدّقني حتى ف يوم ما مشيت العكس واما الكل بيبعد فضلت كانت هيّ معايا وبس !! ____ كنت بشوف ف عينيها رجولتي لما تغطي رقبتي كوفية كانت أصلا غزل إيديها .. خايفة تجيلي لسعة برد .. واما اتأخر كانت تقلق تسأل عني طوب الأرض .. واما تلومني .. بضحك منها !! كنت برد بكل برود : إيه يا عبيطة ليه قلقانة ؟؟ إنتي جبانة .. وأطمنها إني حاميها !! إزاي إيد تتمد عليها وانا موجود ؟! ____ مرة كلاب الظلم شافوها نهشوا الفاضل من ضحكتها نسلوا الباقي من رقتها زي الخيط .. سحلوا طيبتها شدوا جيبتها واتعريت .. هي ف عتمة سجنها حرة وانا محبوس ف انوار البيت .. ربطوا إيديها واتكتفت .. ____ بص ف عيني وشوف الذل إن الحل مهوش ف إيديا !! واني كسرت كلامي وخفت واني ضعفت لما عرفت .. وان بلاط السجن الساقع كان بيخلي لحافي اشواك وان الضلمة بتعمي هناك وان الأكل صفايح زفت واني قرفت بص ف عيني وقد ماشفت مين الوقتي الراجل فينا ومين الست ؟؟ ____ تعرف إيه عن جرح القلب ؟؟ جرح القلب مهوش بيلمّ من غير صرخة ومن غير دمّ مش مسموع طعنة بتغرس جوة ضلوع مش باينين .. هيّ قلوب ماشية برجلين .. ____ تعرف إيه عن ضحكة تداري حسرة بتنطق بيها دموع ؟؟ لما يبان انك قلقان .. غصبن عنها بس الدمعة نزلت من غير استئذان !! تعرف إيه عن يوم ف السجن يتجددله ايام وشهور نور الشمس مهوش بيبان .. واما الصوم بيعدي أدان بعد أدان .. تعرف إيه عن طعم الجوع ؟؟ ____ إيه وداها ؟؟ تنزل ليه ؟؟ برر جبنك للسامعين .. عادي السحل وعادي القتل ؟؟ إيه الشرع وإيه الدين ؟؟ عادي إيديه تتمد عليها قطع إيديه بكرة الدور هيعدي عليك أصل دا دين .. لازم حتما هتوفيه !! ____ رقة صوتها بتزلزلهم تحفر فيهم مليون شق لما بتهتف بتحمسني تملا القلب حياة ويدق نصي الحلو بتنطق ثورة لما تقول للظالم لآ إزاي صوتها ف عينهم عورة لما بينطق كلمة حق ؟! ____ Original Soundtrack : Amir Hedayah - Hope for Children